Rural Payments and Services

Mus cur sibh iarrtas a-steach don sgeama seo, bu chòir dhuibh an stiùireadh slàn a leughadh. Ma tha ceistean sam bith agaibh, cuiribh fios thugainn.

Stiùireadh slàn mun sgeama

Ma tha sibh feumach air cuideachadh sam bith an stìuireadh seo a chleachdadh, faodaidh sibh coinneamh a chur air dòigh aig oifis sgìreil faisg oirbh fhèin.

Cuir coinneamh air dòigh

Chaidh an sgeama seo ùrachadh air 1 Giblean, 2016, le atharrachaidhean susbainteach ris an stiùireadh. Faodar an stiùireadh bhon t-seann sgeama a leughadh san tasglann.

Tasglann Sgeama Maoineachaidh airson Taighean-croite

Tha an sgeama seo fosgailte airson iarrtasan bho:

• croitearan-màil
• neach-còmhnaidh air croit a chaidh fhaighinn bho uachdarain sna seachd bliadhna mu dheireadh
• coitearan
• croitearan Caolais

Airson maoineachadh fhaighinn, feumaidh nach eil àite-fuirich freagarrach agaibh airson fear de na h-adhbharan seo:

• chan eil ur n-àite-fuirich an-dràsta mòr gu leòr airson sibh fhèin agus ur teaghlach
• chan eil ur n-àite-fuirich aig ìre a tha freagarrach, am beachd an neach-sgrùdaidh againne
• tha sibh a’ fuireach còmhla ri ur pàrantan, tha sibh nas sine na 21 bliadhna agus ’s urrainn dhuibh sealltainn gu bheil sibh air a bhith ag obair na croite airson còrr is dà bhliadhna

Neo, feumaidh sibh a bhith feumach air taigh air a’ chroit airson fear de na h-adhbharan seo:

• tha feum agaibh a bhith an làthair fad an t-siubhail airson na seòrsaichean àiteachais air a’ chroit
• tha gnìomhachas eile, nach eil co-cheangailte ri àiteachais, a’ ciallachadh gu bheil feum agaibh a bhith fuireach air a’ chroit
• tha sibh an-dràsta ann an àite-còmhnaidh air mhàl (a’ gabhail a-steach taigheadas comhairle)

Tha casg ann air am maoineachadh a tha ri fhaotainn tron sgeama seo agus ’s dòcha nach bi e comasach gum faigh a h-uile tagradh a tha iomchaidh ceadachadh. (Gheibhear na slatan-tomhais ann an Leas-phàipearan B agus C den stiùireadh slàn).

Ma thachras seo, seo na slatan-tomhais a chleachas sinn airson prìomhachas a dhearbhadh eadar tagraidhean:

• ur n-àite-fuirich an-dràsta
• cuin a thàinig sibh a dh’fhuireach air a’ chroit agus an obair a rinn sibh bhon a thàinig sibh
• an t-airgead a tha ur teaghlach a’ cosnadh gu h-iomlan
• togalaichean sam bith, air a’ chroit neo far a’ chroit, a dh’fhaodadh a reic airson airgead fhaighinn gus taigh-croite ùr a thogail
• gniomhachas sam bith a th’ air a’ chroit, neo a tha am beachd a bhith air a’ chroit
• leasachaidhean sam bith a tha èifeachdach le cumhachd a tha am beachd

Tha an sgeama a’ toirt seachad diofar ìrean de thaic a-rèir an sgìre far a bheil croit. Tha na diofar sgìrean air am mìneachadh air am mapa ‘Sgìrean le Prìomhachas’ a gheibh sibh còmhla ris am foirm tagraidh.

’S e na diofar ìrean taic:

Maoineachadh airson Taigh Ùr

Sgìre le Prìomhachas:

• àrd: £38,000
• àbhaisteach: £28,000

Maoineachadh airson Ath-thogail agus Leasachadh

Sgìre le Prìomhachas:

• àrd: 40 sa cheud de chosgaisean, suas gu £38,000
• àbhaisteach: 30 sa cheud de chosgaisean, suas gu £28,000

Mus cuir sibh foirm iarrtais thugainn tha feum agaibh air Àireamh Clàraidh Gnothachais (BRN). Mura bheil BRN agaibh, cuiribh fios don oifis sgìreil RPID ionadail agaibh.

Gheibh sibh am foirm iarrtais gu h-ìosal.

Thèid iarrtasan a mheasadh san àbhaist ann an cuairtean de 3 mìosan. Tha na cinn-latha airson gach cuairt gu h-ìosal.

• sgeama a' fosgladh - 1 Giblean 2016
• ceann-latha airson a' chiad cuairt - 1 Cèitean 2016
• ceann-latha airson an dàrna cuairt - 1 Lùnastal 2016
• ceann-latha airson an treas cuairt - 1 Samhainn 2016
• ceann-latha airson a' cheathramh cuairt - 1 Gearran 2017

Pàighidh sinn airson obair fhad ’s a tha obair a’ dol air adhart, nuair a gheibh sinn ur tagraidhean. Tha cead agaibh suas ri trì tagraidhean a chur thugainn.

Bu chòir dhuibh cuidhteasan a chur thugainn a dhearbhas obair sam bith san tagradh agus bu chòir ainm-sgrìobhte neach-tomhais a bhith orra.

Faodaidh paighidhean airson obair ath-thogail agus leasachaidh a bhith ann an suas ri trì earrainn cuideachd.

Ma shoirbhicheas leis an iarrtas agaibh don sgeama seo agus ma gheibh sibh maoineachadh, faodaidh sinn sgrùdadh a dhèanamh air a’ phròiseact agaibh aig àm sam bith taobh a-steach 15 bliadhna airson togalach ùr agus 10 bliadhna airson obair leasachaidh.

Nì ar luchd-sgrùdaidh sgrùdadh air an taigh agus air a’ chroit a-rèir na cumhachan airson am maoineachadh.

Gheibh sibh tuilleadh fiosrachaidh mu sgrùdaidhean sa cheangal gu h-ìosal.
Sgrùdaidhean

Ma gheibh sinn fios nach eil sibh air a bhith a’ cumail ri cumhachan an sgeama tha e coltach gum feum sinn am maoineachadh (neo earrann dhe) iarraidh air ais, le riadh air a chur ris.

Tha fiosrachadh mu carson a bhios againn seo a dhèanamh sa cheangal gu h-ìosal.

Mi-cheadachadh agus Peanasan

Mura bheil sibh toilichte le co-dhùnadh a ruig sinn mu dheidhinn ur n-iarrtas, faodaidh sibh ath-sgrùdadh iarraidh.

Cuideachd, mura bheil sibh toilichte le ìre an t-seirbheis a tha sibh air fhaighinn, tha modh-obrach gearanan againn airson ur cuideachadh fuasgladh fhaighinn.

Bu chòir dhuibh ur gearan neo iarrtas airson ath-sgrùdadh a chur ann an litir gu:

Ceannard
Sgeama Maoineachaidh airson Taighean-croite
Ionad Gnothachais
Crossapol
Eilean Thiriodh
PA77 6UP

Gheibh sibh tuilleadh fiosrachaidh mu dheidhinn mar a chuireas sibh ath-thagradh neo gearan thugainn air na duilleagan gu h-ìosal.

Ath-thagraidhean

Gearanan

Ma tha ceistean sam bith agaibh mun sgeama, cuiribh fios thugainn.

Gheibh sibh ar fiosrachadh gu h-ìosal.

Cuiribh fios thugainn